Emri i Pep Guardiola ka hyrë papritur në diskutimet për pankinën e Italisë, duke u kthyer në një ide që për shumëkënd duket e pamundur, por jo plotësisht jashtë realitetit. Ish-mbrojtësi Leonardo Bonucci, duke folur gjatë Laureus World Sports Awards, hodhi idenë që një rifillim i vërtetë për “Azzurrët” duhet të nisë pikërisht me trajnerin spanjoll.
“Do të ishte një ndryshim radikal nga gjithçka që ka ndodhur. Është shumë e vështirë, por të ëndërrosh nuk kushton asgjë”, u shpreh Bonucci, në një moment kur Italia po kalon një periudhë të vështirë dhe kërkon një drejtim të ri pas dështimeve të fundit.
Sipas mediave italiane, ideja nuk është krejtësisht pa bazë. Guardiola ka ende një vit kontratë me Manchester City dhe një pagë shumë të lartë, rreth 25 milionë euro në sezon, çka e bën këtë operacion tepër të vështirë në aspektin financiar. Megjithatë, lidhja e tij me Italinë është e fortë që nga koha kur luajti te Brescia dhe më pas te Roma, një periudhë që ka lënë gjurmë te trajneri katalanas.
Gjithçka do të varet edhe nga zhvillimet në Federatën Italiane të Futbollit, ku më 22 qershor priten zgjedhjet për presidentin e ri, i cili do të marrë vendimin për trajnerin e ardhshëm. Në listë janë përmendur emra si Conte, Allegri dhe Mancini, ndërsa tani edhe Guardiola shihet si një “ëndërr” që mund të marrë formë.
Në rast se vendos të largohet nga Manchester City pas një dekade suksesi, Guardiola mund të konsiderojë një sfidë të re, më pak intensive në aspektin e përditshëm, por shumë të rëndësishme në ndërtimin e një projekti të ri për kombëtaren italiane.
