Presidenti Donald Trump, lajmëroi mbrëmjen e djeshme zgjatjen e armëpushimit me Iranin, por bllokada amerikane e porteve iraniane do të vazhdojë, teksa tashmë kujtojmë se është në javën e saj të dytë.
Arsyeja përse presidenti nuk pranon të zhbllokojë Hormuzin për anijet iraniane është sepse sipas tij kjo do të dëmtonte përspektivat e një marrëveshjeje paqeje.
“Katër ditë më parë, disa njerëz më kontaktuan dhe më thanë: ‘Zotëri, Irani dëshiron ta rihapë Ngushticën menjëherë’. Por nëse e bëjmë këtë, nuk do të ketë kurrë një marrëveshje me Iranin, nëse nuk e shkatërrojmë pjesën tjetër të vendit të tyre, përfshirë udhëheqësit e tyre”, është shprehur Trump.
Kurse i dërguari i Iranit në Kombet e Bashkuara Amir Saerid Iravani u shpreh: “Sapo Uashingtoni t’i japë fund bllokadës detare, mendoj se raundi tjetër i negociatave do të mbahet në Islamabad”
Udhëtimi i zëvendëspresidentit JD Vance në Pakistan për një raund të dytë bisedimesh u anulua për ditën e sotme. Kurse Irani këmbëngul që Trump ta heqë bllokadën përpara se Teherani të angazhohet në një raund të ri bisedimesh. Më parë, ministri i jashtëm i Iranit, Abbas Arahgchi, tha se bllokada amerikane përbënte një “akt lufte” dhe përbënte një shkelje të armëpushimit.
Por Trump i ka “rezistuar” kërkesës. “Ne nuk do ta hapim ngushticën derisa të kemi një marrëveshje përfundimtare”,tha ai
Irani po ashtu ka bërë me dije se nuk ka asnjë formë që në tryezën e bisedimeve të negociohet për programin e tyre bërthamor, edhe nëse SHBA heq bllokadën detare në Ngushticën e Hormuzit.
“Edhe nëse hiqet bllokada, pjesëmarrja jonë në negociata duhet të kushtëzohet nga mosngritja e çështjeve që shkelin pavarësinë dhe dinjitetin tonë, para së gjithash aftësitë tona mbrojtëse dhe raketore, si dhe aftësitë dhe njohuritë tona bërthamore”, raportohet në televizionin shtetëror iranian.
