Ministri i Mbrojtjes i Izraelit, Israel Katz, ka kërcënuar udhëheqjen e Hezbollah gjatë një ceremonie përkujtimore për ushtarët e rënë.
Katz deklaroi se Izraeli do të vijojë operacionet ushtarake edhe gjatë periudhave të armëpushimit, nëse kjo konsiderohet e nevojshme për mbrojtjen e forcave të tij në Liban.
Sipas tij, vendimi është marrë në koordinim me kryeministrin Benjamin Netanyahu, duke i dhënë ushtrisë izraelite mandat për të vepruar me forcë ndaj çdo kërcënimi.
“Ne kemi urdhëruar Forcat e Armatosura të Izraelit të veprojnë me vendosmëri, edhe gjatë armëpushimit, për të mbrojtur ushtarët tanë në Liban nga çdo rrezik,” u shpreh Katz.
Ai theksoi se një nga prioritetet kryesore të qeverisë izraelite mbetet garantimi i sigurisë për banorët në veri të vendit, duke e cilësuar këtë si një detyrim të panegociueshëm.
Ministri paralajmëroi gjithashtu se Izraeli do të vijojë të godasë çdo kërcënim që vjen nga zonat në veri të lumit Litani, duke lënë të hapur mundësinë për zgjerimin e operacioneve ushtarake.
Në deklaratën e tij, Katz sulmoi drejtpërdrejt edhe drejtuesin e Hezbollahut, Naim Qassem, duke paralajmëruar pasoja të rënda për organizatën dhe udhëheqjen e saj.
Ai bëri një krahasim me operacionet izraelite kundër Hamas në Rripin e Gazës, duke theksuar se Izraeli është i vendosur të veprojë me të njëjtën forcë kundër çdo kërcënimi.
