Sergio Aguero ka dhënë mendimin e tij për të ardhmen e Julian Alvarez, në një moment kur sulmuesi i Atletico Madrid po ndiqet nga disa klube të mëdha europiane.
Ish-sulmuesi argjentinas beson se Alvarez do t’i përshtatej më shumë Barcelona sesa Arsenal, pavarësisht interesimit të fortë nga klubi londinez.
Aguero, i cili ka luajtur edhe për Barcelona para se të tërhiqej nga futbolli në vitin 2021, theksoi se sulmuesi argjentinas do të ishte një përforcim i shkëlqyer për çdo skuadër, por sipas tij stili i lojës i Barcelona do t’i shkonte më shumë 26-vjeçarit.
“Julian do të ishte një goditje e mirë për çdo ekip sot. Te Barcelona gjithçka varet nëse ai do të ndihej rehat. Janë dy anë, ajo e lojtarit dhe ajo e klubit. Nëse gjërat ecin mirë, një ditë ai mund të bëhet kampion i Champions League”, deklaroi Aguero për Stake.
Ai shtoi më tej se Alvarez i përshtatet në mënyrë perfekte profilit që kërkon Barcelona në repartin ofensiv.
“Nëse Barcelona po e vëzhgon dhe ai po ecën mirë, atëherë ai përshtatet në mënyrë perfekte. Ai e dashuron futbollin dhe ka diçka që jo shumë sulmues e kanë: përkushtimin e madh edhe në fazën mbrojtëse. Julian është një lojtar shumë i kompletuar”, u shpreh ish-ylli argjentinas.
Julian Alvarez është kthyer në një nga sulmuesit më të kërkuar në Europë pas paraqitjeve të tij me Atletico Madrid, që prej largimit nga Manchester City. Këtë sezon, ai ka shënuar 18 gola dhe ka dhënë 9 asistime në 46 ndeshje në të gjitha kompeticionet.
Arsenal vazhdon të kërkojë përforcime në sulm për sezonin e ardhshëm dhe raportohet se mund të ofrojë rreth 86 milionë paund për kartonin e tij. Në të njëjtën kohë, edhe Barcelona po shqyrton opsione afatgjata për repartin ofensiv, ndërsa Alvarez vlerësohet për lëvizshmërinë, presingun dhe finalizimin e tij.
Megjithatë, Atletico nuk pritet ta lëshojë lehtë një nga lojtarët më të rëndësishëm të Diego Simeone, ndërsa afati kalimtar i verës pritet të japë një panoramë më të qartë për të ardhmen e sulmuesit argjentinas.
