Alessandro Bastoni pritet të mungojë në ndeshjen ndaj Cagliari, në një vendim që lidhet me nevojën për ta mbrojtur lojtarin si fizikisht, ashtu edhe psikologjikisht. Nuk bëhet fjalë për ndonjë ndëshkim, përkundrazi, Christian Chivu duket i prirur t’i japë mbrojtësit një pushim të shkurtër, pas sinjaleve që ai dha edhe në pjesën e parë të ndeshjes ndaj Como.
Ideja është që Bastoni të menaxhohet me kujdes, edhe në funksion të gjysmëfinales së Kupës së Italisë, që Inter do ta luajë sërish në “San Siro” të martën, po ndaj Como. Ndërkohë, Carlos Augusto pritet të rikthehet në treshen mbrojtëse, ashtu si në pjesën e dytë të ndeshjes së fundit, me shumë gjasa përkrah Akanji dhe Acerbi.
Bastoni do të ketë kështu më shumë ditë në dispozicion për t’u stërvitur dhe për të lënë pas shqetësimin në tibie, një problem që e ka ndjekur edhe pas natës dramatike në Zenica me kombëtaren. Në këtë fazë të sezonit, Inter nuk dëshiron të rrezikojë përkeqësimin e situatës.
Brenda klubit nuk ka asnjë përplasje me lojtarin. Vendimi konsiderohet si një vlerësim i arsyeshëm, i ndarë mes Chivu dhe Bastoni, i cili së fundmi është gjendur në qendër të një periudhe shumë negative. Nga episodi i diskutueshëm me Wirtz në Inter-Liverpool, te simulimi ndaj Kalulu që shkaktoi reagime të shumta, e deri te kartoni i kuq me Italinë në Bosnje, mbrojtësi është kthyer në një figurë shumë të ekspozuar ndaj kritikave.
Edhe zëvendësimi i tij në pushim ndaj Como u interpretua si një sinjal, pasi Inter kishte vuajtur shumë në atë pjesë loje, sidomos nga Nico Paz dhe Diao.
Kjo situatë ka hapur edhe skenarë merkatoje. Nuk është sekret që stafi i Bastoni ka marrë tashmë një ofertë nga Barcelona. Të dy klubet duket se kanë interes për ta çuar përpara operacionin, ndërsa mbetet për t’u përcaktuar vetëm vlera përfundimtare e marrëveshjes.
Vetë Bastoni, megjithëse është shumë i lidhur me klubin dhe me Italinë, duket se e ka kuptuar se një aventurë jashtë vendit mund ta ndihmojë të rigjejë qetësinë dhe të hapë një kapitull të ri në karrierë.
Risia më e fundit është se Barcelona, për të ulur shumën cash që duhet t’i paguajë Inter, po mendon të përfshijë në marrëveshje Hector Fort, mbrojtësin e djathtë të lindur në vitin 2006. Lojtari aktualisht është jashtë fushave për shkak të një dëmtimi në shpatull, pas një fillimi pozitiv të sezonit në huazim te Elche.
Megjithatë, Inter e vlerëson Bastoni rreth 60 milionë euro dhe nuk ka ndërmend ta lëshojë lehtë.
Sa i përket ndeshjeve të ardhshme, Lautaro dhe Bisseck do të mungojnë për shkak dëmtimi, ndërsa Chivu pritet të bëjë vetëm rotacion të kufizuar. Ndryshimi i sigurt do të jetë në portë, me Sommer që pritet të luajë nesër dhe Martinez të martën.
