Trajneri i Real Madridit, Alvaro Arbeloa, ka reaguar me tone shumë të ashpra pas eliminimit nga Bayern Munich në Champions League, duke kritikuar fort përjashtimin e Eduardo Camavinga në fund të ndeshjes.
Sipas tij, arbitri prishi një përballje të madhe dhe një ndeshje shumë emocionuese me vendimin për ta ndëshkuar francezin me kartonin e dytë të verdhë. Camavinga u përjashtua në minutën e 86-të pasi mbajti topin pas një faulli të kryer, ndërsa Arbeloa beson se gjyqtari Vincic nuk e kishte kuptuar se lojtari kishte tashmë një karton.
“Nuk mund ta përjashtosh një lojtar për diçka të tillë. Mendoj se arbitri nuk e dinte që ai kishte një karton të verdhë dhe kështu prishi një duel dhe një ndeshje që ishte shumë emocionuese, e balancuar dhe në kulmin e saj”, deklaroi Arbeloa për Movistar Plus.
Tekniku madrilen vlerësoi maksimalisht paraqitjen e skuadrës së tij, duke theksuar se lojtarët dhanë gjithçka në fushë dhe se ndien keqardhje të madhe për tifozët.
“Ishte një ndeshje e madhe nga lojtarët e mi. Më vjen keq për ta, për sakrificën që bënë, si edhe për tifozët e Real Madridit që erdhën këtu dhe për ata që na ndoqën nga shtëpia. Dhemb sepse Real Madridi nuk do ta fitojë Kupën e 16-të të Europës këtë vit. Jam shumë krenar për atë që ka bërë skuadra, për punën e saj. Ata dhanë gjithçka dhe ne po kthehemi në Madrid me stemën tonë, sepse ata luftuan deri në fund”, u shpreh ai.
Arbeloa theksoi gjithashtu se skuadra e tij kishte ende mundësi për ta kthyer kualifikimin në pjesën e dytë, pak para golit të Luis Diaz që ndryshoi rrjedhën e ndeshjes.
“Tani duhet të vazhdojmë. Ky është Real Madridi. La Liga është shumë e vështirë, por ne duhet të luftojmë deri në javën e fundit, deri në fund të sezonit. Ne kemi një stemë për të mbrojtur”, deklaroi ai.
Në konferencën për shtyp, Arbeloa foli edhe për të ardhmen e tij, duke thënë se do ta kuptonte çdo vendim që klubi mund të marrë për pankinën sezonin e ardhshëm.
“Që kur jam ulur në këtë karrige, nuk kam qenë këtu për të provuar nivelin tim si trajner. Nuk kam dashur të fitoj me vendimet e mia, por duke ndihmuar lojtarët tanë. Kemi përballuar shumë skuadra si City, Atletico dhe Bayern. Ato skuadra kanë vulën e trajnerëve të tyre, unë nuk e di çfarë vule ka kjo skuadër nga unë. Gjithmonë kam ndihmuar klubin në çdo mënyrë që kam mundur dhe kështu do të vazhdoj deri në ditën e fundit”, tha ai.
Në fund, trajneri i Real Madridit theksoi se nuk shqetësohet shumë për fatin e tij personal, por vetëm për të mirën e klubit.
“Nuk më shqetëson aspak dhe do ta kuptoj çdo vendim që klubi merr. Unë jam njeri i Real Madridit dhe nëse sot vuaj, nuk vuaj për veten time, por për Real Madridin. Vuaj për lojtarët, jo për veten, sepse e ardhmja ime është shqetësimi më i vogël. Mendoj se kam bërë gjithçka që mundesha për të ndihmuar skuadrën”, përfundoi ai.
