Arkivat shpesh nxjerrin në pah deklarata që më pas rezultojnë të pasakta, sidomos në botën e futbollit, por në këtë rast ato po i japin të drejtë Toni Kroos.
Ish-mesfushori i Real Madrid nuk njihet si një person që i zbut fjalët kur jep mendimin e tij dhe që në janar ai kishte paralajmëruar se Barcelona nuk mund ta fitonte Champions League nëse nuk ndryshonte stilin e lojës.
Pas fitores së Barcelonës ndaj Real Madrid në finalen e Superkupës së Spanjës në janar, Kroos foli në podcastin e tij për mënyrën se si luante skuadra katalanase, duke theksuar se me atë qasje ishte e pamundur të fitonte trofeun më të madh europian.
“Janë ende shumë të lumtur për Superkupën e Spanjës, por tani vjen Champions League për Barcelonën, aty ku përballen me kundërshtarë të nivelit të lartë. Ata nuk do të fitojnë asnjë trofe ndërkombëtar, nuk do ta fitojnë Champions League. Nëse je i lodhur dhe nuk e ndryshon stilin e lojës, bëhet shumë e qartë sa i cenueshëm je. Çdo skuadër mund t’u shkaktojë probleme dhe t’i eliminojë nga Champions League”, ishte deklarata e Kroos.
Nuk është hera e parë që Kroos kritikon stilin e lojës së Barcelona të drejtuar nga Flick. Edhe sezonin e kaluar ai ishte shprehur se skuadra nuk mund ta fitonte Champions League nëse vazhdonte të mbronte në të njëjtën mënyrë.
Deri tani, Barcelona e Flick nuk ka arritur të shkojë në finalen e Champions League në dy vitet e tij në stol, duke bërë që fjalët e Kroos të rikthehen sërish në qendër të diskutimit.
