Atletico Madrid po feston në rrjetet sociale kualifikimin në gjysmëfinalen e Champions League, teksa ka lëshuar disa thumbime ndaj Barcelona për qasjen e saj para përballjes së fazës kualifikuese.
Të mërkurën, llogaria zyrtare e klubit në platformën X publikoi mesazhin se “e do aromën e barit të sapoprerë në mëngjes”, të shoqëruar me një foto të flamurit të këndit nga stadiumi Metropolitano.
Gjithçka lidhet me ankesat e Barcelona dhe Flick, të cilët kishin deklaruar se bari në stadium ishte më i gjatë sesa gjatësia e lejuar. Më pas, UEFA konfirmoi se ai do të pritej në 26 milimetra para fillimit të ndeshjes, pra brenda kufirit të përcaktuar.
Deklarata e Atletico është një parafrazim i një prej skenave më të njohura të filmit Apocalypse Now (1979), i vendosur në sfondin e Luftës së Vietnamit, ku personazhi i luajtur nga Robert Duvall thotë: “I love the smell of napalm in the morning”.
Ky nuk ishte mesazhi i vetëm i dërguar nga Atletico në rrjetet sociale. Klubi publikoi edhe disa foto të lojtarëve të tij me syze të zeza dhe kufje të bardha, duke imituar imazhin e LeBron James gjatë rikthimit historik të Cleveland Cavaliers ndaj Golden State Warriors në finalet e NBA në vitin 2016.
Foto të ngjashme ishin publikuar edhe nga tifozë të Barcelona para ndeshjes së së martës, një trend që u ndoq edhe nga disa lojtarë si Lamine Yamal dhe Pedri.
Atletico Madrid publikoi gjithashtu një video ku një luan, mbi të cilin ishte vendosur stema e Barcelona, dukej sikur po tentonte të sulmonte një grup turistësh në një safari, por në fund rezultonte të ishte një qen i butë.
Atletico Madrid siguroi kualifikimin në gjysmëfinalen e Champions League të martën, pavarësisht humbjes 1-2 në ndeshjen e kthimit në Metropolitano, pasi kishte fituar takimin e parë 0-2 në Camp Nou.
