Një zjarr i përmasave të mëdha përfshiu pasditen e së martës një kompleks pallatesh pranë zonës së “Farmacia 10” në Tirana, duke shkaktuar panik dhe dëme të konsiderueshme materiale.
Lidhur me ngjarjen ka reaguar edhe kryeministri Edi Rama, i cili garantoi se pallati i dëmtuar do të rindërtohet plotësisht nga vetë ndërtuesi, pavarësisht se, sipas të dhënave paraprake, shkaku i zjarrit nuk lidhet me cilësinë e ndërtimit.
Reagimi:
Pallati që u dogj dje në Tiranë, do të rindërtohet 100% nga vetë ndërtuesi, pavarësisht se nga të dhënat paraprake shkaku i zjarrit s’ka asnjë lidhje me vetë ndërtimin! Sepse ne nuk mund t’i lemë vetëm njerëzit e dëmtuar në pronën e tyre dhe nga ana tjetër, taksapaguesit nuk mund të paguajnë një dëm të cilin duhet ta paguanin sigurimet – rast kuptimplotë për të kuptuar të gjithë se sigurimi i shtëpisë nga fatkeqësitë është i domosdoshëm. Gjithësesi, të gjithë familjarëve të dëmtuar u them të ndjehen të qetë nga kjo anë dhe iu uroj vetëm shëndet, duke falenderuar nga zemra zjarrfikësit e forcat e rendit për punën heroike në shpëtimin e të gjitha jetëve të rrezikuara.
