Këto janë pasojat e zjarrit që përpiu pallatin te Farmacia 10 në Tiranë. 30 apartamente janë prekur nga flakët që nisën në katin e parë të njërit prej bizneseve.
Verifikimi në orët në vijim do të pasqyrojë një bilanc të plotë. Paraprakisht, evidentohet se disa apartamente janë djegur plotësisht, ndërsa të tjerë mund të jenë dëmtuar më lehtë.
Zjarri që ka shpërthyer në një nga bizneset ka mbuluar gjithë vetratën për pak minuta. Zjarri mund të ketë lindur në hapësirën e jashtme ku mund të ketë pasur mbeturina. Nuk dihet ende nëse ka pasur ndonjë kuti të shpërndarjes së energjisë elektrike në afërsi.
Flakët i kanë gjetur gjithë banorët të papërgatitur për shkak të përmasave të shpejta që kanë marrë.
Distanca nga fasada te burimi i zjarrit dyshohet të mos ketë qenë më shumë se një metër.
Shkaku i zjarrit nuk është përcaktuar ende. Fasada, e cila ka dy shtresa, është djegur e tëra në pjesën e jashtme të saj.
Më konkretisht, materiali prej leshi xhami në shtresën e dytë nuk është djegur. Materiali që është djegur është veshja me ngjyrë të bardhë e të kuqe. E gjithë veshja e bardhë është shkrumbuar totalisht, kurse e kuqja duket tek-tuk që ka rezistuar disi.
Pamjet apokaliptike tregojnë ndërtesën e shkrumbuar, rrënojat në këmbët e saj dhe tymin që ende del.
Aktualisht situata është nën kontroll dhe nuk ka rrezik për shpërndarje të zjarrit.
