Manuel Neuer ka dhënë një mesazh të qartë para sfidës së kthimit mes Bayern Munich dhe Real Madrid në Champions League, duke theksuar se përballë skuadrës spanjolle nuk duhet humbur asnjëherë vigjilenca.
Portieri dhe kapiteni i bavarezëve u shpreh në konferencën për shtyp se avantazhi minimal nga ndeshja e parë nuk mjafton për ta bërë Bayern të ndihet i sigurt, pasi Real Madrid mbetet një kundërshtar shumë i rrezikshëm.
“Duhet të kemi kujdes, sepse e kemi parë edhe më parë se si Real Madrid arrin të fitojë. Nëse janë në një ditë të mirë, mund të eliminojnë këdo”, deklaroi Neuer.
Megjithatë, gardiani gjerman sqaroi se skuadra e tij nuk duhet të mbetet e fokusuar te e kaluara, por te ajo që duhet të bëjë në fushë.
“Si profesionistë, nuk merremi shumë me të kaluarën. Duhet të përqendrohemi te e tashmja”, shtoi ai.
Neuer theksoi se avantazhi i vetëm i Bayern është fitorja me një gol diferencë në ndeshjen e parë, por vlerësoi si një element të rëndësishëm faktin që takimi i kthimit luhet në “Allianz Arena”, përpara tifozëve bavarezë.
“Avantazhi ynë i vetëm është se kemi një gol epërsi, por përballë kemi Real Madrid dhe është një sfidë shumë e vështirë. Jemi me fat që e luajmë ndeshjen e kthimit në shtëpi dhe llogarisim shumë te tifozët tanë”, u shpreh ai.
Duke folur për kundërshtarët, Neuer shmangu përqendrimin te emrat individualë si Vinicius, duke insistuar se Bayern duhet të mendojë për forcën kolektive të Real Madrid.
“Nuk ka rëndësi emri i lojtarëve. Më e rëndësishme është ta shohim këtë si një ndeshje Champions League kundër Real Madrid si skuadër, jo kundër yjeve individualë”, tha portieri.
Ai nuk pranoi të ndalej gjatë te përmbysja e famshme e Real Madrid ndaj Bayern në të kaluarën, si dhe shmangu komentet për episodin me Joselu, duke theksuar se kjo është një përballje tjetër dhe se skuadra aktuale është ndryshe.
Sa i përket të ardhmes së tij, Neuer la të kuptohet se një vendim është afër, por ende nuk ka marrë një qëndrim përfundimtar.
“Sa më shpejt ta marr vendimin, aq më mirë. Nuk do të varet nga titujt që fitojmë. Ende nuk kam vendosur, por nuk do të zgjasë shumë”, përfundoi ai.
Bayern dhe Real Madrid do të përplasen në një nga sfidat më të mëdha të sezonit, me Neuer që kërkon kujdes maksimal dhe pjekuri nga skuadra e tij përballë një kundërshtari që, sipas vetë tij, mbetet gjithmonë i aftë të ndryshojë gjithçka.
