Harry Kane po punon për një projekt gjigant në Angli, që sipas raportimeve dhe banorëve të zonës ngjan me një version në miniaturë të Buckingham Palace.
Sulmuesi i Bayern Munich thuhet se po ndërton një mega-vilë në Surrey, në jug të Anglisë, me një vlerë që arrin rreth 23 milionë euro. Sipas skicave të publikuara, rezidenca do të ketë një fasadë me dritare në stilin gjeorgjian dhe kolona imponuese, duke sjellë pamje të ngjashme me rezidencën e famshme mbretërore në Londër.
Një banor i zonës ka treguar se Kane bleu pronën, shembi shtëpinë e vjetër dhe prej rreth dy vitesh po ndërton një të re nga e para. Sipas tij, pjesa ballore e ndërtesës të kujton menjëherë Buckingham Palace.
Luksi nuk kufizohet vetëm në pamjen e jashtme. Brenda projektit parashikohet të ndërtohen një kinema private, pishinë, bar, palestër dhe një dhomë trajtimi personal. Gjithashtu, vila do të ketë një garazh për pesë makina, si edhe një platformë rrotulluese me vlerë 20 mijë euro për parkimin më të lehtë të automjeteve luksoze.
Raportohet se ndërtimi i kësaj rezidence është pranë përfundimit. Kane e kishte blerë pronën që në vitin 2023 për rreth 7.5 milionë euro, përpara se të vendoste të prishte banesën ekzistuese dhe të niste projektin e ri.
Aktualisht, kapiteni i Anglisë jeton me bashkëshorten Kate dhe katër fëmijët e tyre në një vilë në Gjermani, pranë Mynihut, jo shumë larg qendrës stërvitore të Bayern.
Mbetet ende e paqartë se kur familja Kane do të rikthehet përfundimisht në Angli. Kontrata e sulmuesit me Bayern Munich është e vlefshme deri në vitin 2027, ndërsa klubi bavarez synon ta zgjasë bashkëpunimin. Nga ana tjetër, Kane ndihet shumë mirë në Mynih, por fillimisht synon të mbyllë sezonin me trofe.
Pjesa e perparme e Buckingham Palace:
