Ambasadori i Bashkimit Evropian në Shqipëri, Silvio Gonzato, ka zhvilluar këtë të enjte takime me përfaqësues të forcave të reja politike, duke vënë theksin tek rëndësia e pluralizmit dhe një sistemi zgjedhor të drejtë.
Në një postim publik, Gonzato bën të ditur se ka zhvilluar biseda me Adriatik Lapaj nga nisma “Shqipëria Bëhet” dhe Arlind Qorri nga “Lëvizja Bashkë”, ku, sipas tij, është rënë dakord se një demokraci funksionale ndërtohet mbi përfshirjen e zërave të ndryshëm politikë.
Ambasadori nënvizon gjithashtu rëndësinë e barazisë së votës dhe të reformës zgjedhore, si elemente kyçe për rritjen e besimit të qytetarëve dhe përfaqësimin e drejtë në parlament.
Postimi i plotë i ambasadorit Silvio Gonzato:
“Biseda të vlefshme sot me Adriatik Lapajn e #ShqipëriaBëhet dhe Arlind Qorrin e #LëvizjaBashkë, ku ramë dakord se një demokraci e shëndetshme ndërtohet mbi pluralizmin. Bashkëjetesa e zërave të ndryshëm politikë ndihmon në pasqyrimin e vetë strukturës së shoqërisë, siguron përfaqësim të drejtë dhe rrit besimin e publikut. Çdo votë e hedhur duhet të ketë të njëjtën peshë, në mënyrë që rezultatet zgjedhore të pasqyrojnë vullnetin e qytetarëve. Prandaj reforma zgjedhore ka rëndësi. Një kuadër zgjedhor i drejtë dhe transparent siguron që përfaqësimi në parlament të pasqyrojë zgjedhjet e votuesve. Ai fuqizon qytetarët, nxit pjesëmarrjen dhe forcon llogaridhënien.”
