Kreu i Grupit Parlamentar të PS, Taulant Balla, ka reaguar në seancën plenare të Kuvendit lidhur me kërkesën e opozitës për mocion me debat mbi çështjet e integrimit europian.
Në fjalën e tij, ai theksoi se qeveria ka përmbushur detyrimet për raportim, duke përmendur katër raporte të paraqitura, ndërsa pranoi se afatet për zhvillimin e debatit janë tejkaluar.
Balla propozoi që mocioni të zhvillohet në datat 7 ose 14 maj, duke akuzuar njëkohësisht opozitën për mungesë bashkëpunimi dhe mbështetjeje ndaj nismave ligjore, pavarësisht thirrjeve për angazhim në procesin e integrimit në Bashkimin Europian.
“Sa i përket çështjeve të mocionit me debat të kërkuar. Në nëntor kemi bërë një seancë në nëntor, ku kemi rënë dakord që të bëjmë një mocion me debat. Kemi thënë që sapo të vijë raporti do i bëjmë, pa dyshim që jemi të gjitha dakord që ne na ka kaluar afati. Por, të vish këtu dhe të thuash që qeveria nuk ka raportuar fare për integrimi, ja ku i keni katër raporte. Qeveria e ka bërë këtë pjesë. Unë kam thënë që në datën 7 apo 14 maj, ta zhvillojmë këtë debat dhe këtu ju nuk bini dakord.
Ju thoni që mazhoranca ju ka kufizuar, apo mohuar të drejtën që ju të sillni iniciativa ligjore, unë nuk di që të ndodhë. Edhe këtu e kam një propozim publik. Jemi të gatshëm që t’u miratojmë edhe ju propozimin, por jo me forcë. Sot ju dashnorët më të rinj të anëtarësimit në BE, do ju jap një fakt shumë domethënës. E ke filluar këtë legjislaturë në fund të shtatorit dhe deri më sot ja ku e kemi listën e plotësuar, 23 ligje, në asnjërën prej ty nuk gjendet asnjë votë pro e juaja. Ju këtu vini këtu e na thoni, pse s na votoni ligjet tona.
Ka këtu mes nesh kolegë që mbledhjen e grupit të PS nuk kanë qenë dakord. Për ata që dinë ndopak nga kjo legjislaturë, këtu e dimë që këtu nuk mund të luash asnjë germë. Por, e vërteta e madhe për veshët e publikut dhe dytë e Brukselit është se ju nuk keni votuar asnjë. Nëse doni integrimin në BE, bujrum sillni variantet tuaja”, tha Balla.
