Ushtria izraelite IDF tha sot (8 prill) se kishte goditur më shumë se 100 objektiva që tha se ishin selia e Hezbollahut në Bejrut, Bekaa dhe Libanin jugor në sulmet ajrore brenda 10 minutash.
Ministri i Shëndetësisë i Libanit tha se 89 persona ishin vrarë dhe të paktën 700 të plagosur, ndërsa një zyrtar i lartë iranian tha se do ta ndëshkonte Izraelin për “krimin”.
Sulmet ajrore izraelite shënjestruan ndërtesa banimi, xhami dhe automjete në të gjithë vendin, sipas “Al Jazeera”. Operacionet e shpëtimit janë duke u zhvilluar, ndërsa disa sulme shënjestruan qendrën e Bejrutit, me një ndërtesë në lagjen Corniche al-Mazraa që thuhet se u rrafshua. Sulmet goditën gjithashtu periferitë jugore të kryeqytetit.
Izraeli gjithashtu ka intensifikuar sulmet e tij ajrore në Libanin jugor dhe lindor, me sulme të shumta të raportuara në qytetet bregdetare të Tiros dhe Sidonit, sipas të njëjtave burime.
Deri më tani, ka raportime për një sulm ajror në një funeral në një fshat në Libanin lindor që vrau 10 persona, gjashtë persona u vranë në Sidon, tre në Bejrutin perëndimor, tre vajza në qytetin bregdetar të Adlou, dy në Luginën e Bekaa. Më herët, IDF njoftoi se brenda 10 minutash, kreu sulmin më të madh të koordinuar në të gjithë Libanin që shënjestroi mbi 100 seli të Hezbollahut, instalime ushtarake dhe qendra komande dhe kontrolli në Bejrut, Bekaa dhe Libanin jugor, duke përfshirë: -Qendrat e komandës së inteligjencës dhe selinë qendrore të përdorura për të planifikuar sulme terroriste -Infrastrukturën e artilerisë dhe objektet detare, përgjegjëse për lëshimin e raketave -Pajisjet ushtarake të Forcës Radwan dhe Forcave Ajrore – njësitë elitare të Hezbollahut.
