Gjykata e Romës ka pranuar padinë e ngritur nga organizata Movimento Consumatori kundër Netflix Italia, duke konstatuar se klauzolat që lejonin ndryshimin e çmimit të abonimeve dhe kushteve të tjera kontraktuale nga viti 2017 deri në janar 2024 janë të padrejta dhe për rrjedhojë të pavlefshme. Kjo bëhet e ditur përmes një njoftimi të shoqatës.
“Sipas llogaritjeve, një klient premium që ka paguar pa ndërprerje Netflix që nga viti 2017 deri më sot ka të drejtë të marrë rreth 500 euro rimbursim, ndërsa një klient standard rreth 250 euro. Rritjet e paligjshme prekin edhe planin bazë, i cili pati një rritje prej 2 eurosh në tetor 2024”, thuhet në deklaratë.
Sipas Movimento Consumatori, vendimi i gjykatës detyron Netflix që të ulë edhe çmimet aktuale të abonimeve në të njëjtën masë me rritjet e konsideruara të paligjshme.
“Nëse Netflix nuk ndërhyn menjëherë për të ulur çmimet dhe për të rimbursuar klientët, deklaron Alessandro Mostaccio, president i Movimento Consumatori, ne do të nisim një padi kolektive (class action) për të garantuar që të gjithë përdoruesit të marrin mbrapsht paratë e paguara padrejtësisht.”
