Ministri i Punëve të Brendshme, Besfort Lamallari, ka mbajtur ditën e sotme një konferencë për mediat.
I pyetur lidhur me masat që ka marrë Policia e Shtetit pas njoftimit të bërë dy ditë më parë nga Ambasada e Shteteve të Bashkuara në Shqipëri, e cila u bëri thirrje shtetasve amerikanë të tregojnë kujdes për shkak të një rreziku të mundshëm nga grupe iraniane, ministri theksoi se Shqipëria ka kohë që është në gatishmëri të shtuar.
Lamallari deklaroi se institucionet ligjzbatuese, në bashkëpunim të ngushtë me partnerët ndërkombëtarë, kanë bërë prej kohësh një vlerësim të plotë të riskut dhe kanë hartuar një plan konkret masash.
Lamallari: Shqipëria prej disa kohësh ka marrë masat e nevojshme, në kuptim të vlerësimit të riskut nga gjithë agjencitë ligjzbatuese në bashkëpunim mdhe me partnerët ndërkombëtarë. Kemi bërë vlerësimin e riskut dhe një plan masash lidhur jo vetëm me sigurinë publike në sheshe publike dhe vendndodhje me rëndësi kritike por edhe infrastrukturën kritike në tërësi. Policia e Shtetit është me masa të shtuara sigurie në vendndodhjet që cilësohen me rëndësi kritike.
Kjo ka ndodhur shumë kohë më parë duke marrë parasysh gjithë zhvillimet në Lindjen e Mesme. Kërkova nga struktura e Policisë së Shtetit, përfshirë drejtorinë Antiterror, Policinë Kriminale dhe Sigurinë Publike për të më informuar lidhur me masat që ato kishin marër dhe komunikimet që kishin pasur me përfaqësues të ambasadës. Nga komunikimet është konfirmuar se ky është një lajmërim standard që është bërë edhe në vende të tjera të botës, përfshirë edhe vende të BE. Ata vlerësojnë bashkëpunimin dhe angazhimin e qeverisë shqiptare dhe policisë shqiptare për masat e marra prej kohësh.
Ai nënvizoi se partnerët ndërkombëtarë vlerësojnë bashkëpunimin dhe angazhimin e autoriteteve shqiptare për garantimin e sigurisë, duke theksuar se situata është nën kontroll dhe se nuk ka arsye për panik.
