Kryeministri Edi Rama, gjatë një takimi me Asamblenë e Partia Socialiste e Shqipërisë në Njësinë 14 në Tiranë, ka folur për perspektivën europiane të vendit, duke e cilësuar këtë si një moment historik që nuk duhet humbur.
Rama theksoi se Shqipëria ndodhet në një fazë të favorshme në raport me partnerët ndërkombëtarë dhe se për herë të parë mbështetja e fuqive të mëdha është konkrete.
“Është hera e parë që të gjitha fuqitë e mëdha shqiptarët i kanë me vete në kuptimin konkret, jo me llafe. Asnjëherë nuk e kemi pasur kaq konkrete mundësinë që të bëhemi pjesë e klubit europian,” u shpreh ai, duke iu referuar Bashkimi Europian.
Kreu i qeverisë paralajmëroi se kjo mundësi nuk është e përhershme dhe se dritarja për integrim mund të mbyllet nëse nuk shfrytëzohet në kohë.
“Nuk është derë e hapur përgjithmonë. Mund të mbyllet kjo derë dhe ky moment nuk mund të humbet për asnjë arsye në botë,” deklaroi Rama.
Ai akuzoi opozitën për qëndrime që sipas tij, dëmtojnë procesin e integrimit gjatë kontakteve ndërkombëtare, duke theksuar se një sjellje e tillë nuk është parë në vende të tjera.
“Nuk e kemi parë kurrë në asnjë vend që përfaqësues të shkojnë jashtë dhe të flasin kundër vendit të tyre për të penguar integrimin. Luftë politike ka kudo, por kjo që ndodh në Shqipëri është e paprecedentë,” tha ai.
Rama e cilësoi momentin aktual si një mundësi të rrallë historike për shqiptarët dhe një investim për të ardhmen e brezave të rinj.
“Po dëmtohet një moment ku fati dhe historia po i buzëqesh shqiptarëve. Është diçka madhështore dhe më e jashtëzakonshmja që mund të bëjmë për fëmijët tanë,” u shpreh kryeministri.
