Barcelona po punon për të forcuar repartin defensiv në merkaton e verës dhe një nga emrat më të përfolur është Alessandro Bastoni. Sipas raportimeve, drejtuesit e klubit katalanas kanë bërë përparim të rëndësishëm në bisedimet me Interin për transferimin e mbrojtësit italian.
Thuhet se Barcelona ka arritur tashmë një marrëveshje personale me 26-vjeçarin, ndërsa tani mbetet që të bindë Interin për ta lënë të lirë. Megjithatë, përpara se marrëveshja të finalizohet, klubi spanjoll duhet të realizojë disa largime nga skuadra për të krijuar hapësirë në buxhet.
Bastoni konsiderohet si një përforcim i madh për prapavijën e Barcelonës, falë cilësisë, eksperiencës dhe aftësisë së tij në ndërtimin e lojës nga mbrojtja. Interi, nga ana tjetër, mund të përfitojë financiarisht nga një shitje e mundshme e një prej lojtarëve më të rëndësishëm të skuadrës.
Këtë sezon, Bastoni ka zhvilluar 35 ndeshje me Interin, duke shënuar 2 gola dhe duke dhënë 6 asistime. Kontrata e tij me klubin zikaltër është e vlefshme deri në vitin 2028, ndërsa vlera e tij në treg vlerësohet rreth 70 milionë euro.
