LEGO ka prezantuar një reklamë të veçantë në prag të Botërorit 2026, duke bashkuar katër prej emrave më të mëdhenj të futbollit botëror: Lionel Messi, Cristiano Ronaldo, Kylian Mbappé dhe Vinicius Jr. Në promovimin e ri, yjet shfaqen duke kompletuar trofeun e Kupës së Botës, ndërsa slogani i fushatës është: “Everyone wants a piece”, pra “Të gjithë duan një pjesë”.
Reklama ka tërhequr menjëherë shumë vëmendje, jo vetëm për shkak të emrave të përfshirë, por edhe sepse sjell bashkë figura që zakonisht shihen si rivalë në fushë. Përmes kësaj fushate, LEGO po promovon koleksionin e ri të dedikuar futbollit dhe Botërorit, me sete të veçanta për Messin, Ronaldon, Mbappén dhe Viniciusin, si edhe trofeun zyrtar të FIFA World Cup 2026 në version LEGO.
Botërori 2026 do të zhvillohet nga 11 qershori deri më 19 korrik 2026 dhe për herë të parë në histori do të organizohet nga tre vende njëkohësisht: SHBA, Kanadaja dhe Meksika. Pikërisht për këtë arsye, fushata e LEGO-s po shihet si një nga promovimet më tërheqëse të deritanishme në prag të turneut më të madh të futbollit.
