Pas ngjarjes së rëndë të ndodhur pak orë më parë në fshatin Bulgarec të Korçës, ku gjatë një rasti vjedhjeje mbeti i vrarë një i moshuar, ka folur për kamerën e Euronews Albania komshia e 78-vjeçarit.
Komshia shprehet se Gëzim Vija, viktima e këtij rasti, ka qenë një njeri shumë i mirë dhe pa konflikte në fshat. Sakaq, ajo theksoi se gjatë grabitjes banorët e tjerë të lagjes nuk kishin dëgjuar gjë dhe se kjo ngjarje i kishte ndodhur asaj disa kohë më parë.
“E njihja dhe ishte shumë burrë i mirë, në lagje e kisha për çdo gjë. Vija bëja shatën e kalit dhe ma bënte, shumë burrë i mirë. Ai tani ishte në pension, më parë ka rregulluar makina, goma, por ishte shumë njeri i mirë. Nuk kishte konflikte. Ne u habitëm. Na erdhi shumë keq që nuk dëgjuam asnjë zhurmë. Ky rast më ka ndodhur edhe mua, që më hynë në banjë, më vodhën disa gjëra, por erdhi policia. Ndërsa më parë nuk na kanë ndodhur vjedhje. Të vidhnin, por mos e vrisnin, se ishte shumë gjynah, të merrnin gjithçka në shtëpi, por pse e vranë? Qenë ishte?,” u shpreh komshia.
