Një njoftim i bërë dje nga ambasada amerikane në Tiranë, që paralajmëronte qytetarët e SHBA-së për rrezikun e mundshëm të sulmeve të regjimit iranian ndaj hoteleve, qendrave të biznesit, klubeve dhe restoranteve në Shqipëri, ka ndezur debat mes krerëve të dy grupeve parlamentare. Gjatë seancës plenare, Gazment Bardhi nga PD kërkoi që kryeministri të ishte i pranishëm për t’i dhënë sqarime. Nga ana tjetër, Taulant Balla nga PS theksoi se nuk ka asgjë për t’u alarmuar dhe se Shqipëria mbetet aleate e SHBA-së, e cila gjithmonë ka mbështetur vendin tonë.
Pjesë nga debati
Gazment Bardhi: Përpjekjet për të diskredituar informacionin zyrtar të SHBA si hamendësim e bën Shqipërinë qesharake. Kjo jep mesazhin se qeveria shqiptare nuk ka bashkëpunim me aleatin tonë strategjik në fushën e sigurisë apo më shumë mes dy partnerëve strategjik, anëtarë të NATO-s nuk ka besim te njëri-tjetri. Prandaj mesazhi politik që dha dje Edi Rama është që shqiptarët nuk duhet t’i besojnë SHBA-së për çështje e sigurisë. Ne kërkojmë që kryeministri të paraqitet në seancë plenare dhe të japë shpjegime. Pse e cilësoi hamendësim paralajmërimin e SHBA-së?
Taulant Balla: Mbështes ndërhyrjen e ministrit për Evropën dhe Punët e Jashtme dhe më vjen keq që për hesape të debatit politik dhe të shterpësisë të ideve politike, përdoret një njoftim rutinë si në të gjitha ambasadat e SHBA-së, përfshirë Departamentin e Shtetit i cili në mënyrë të përditshme, në komunikimet e përditshme, prej fillimit të marsit njofton qytetarët e vet në të gjithë botën se mund të jenë target i sulemeve të regjimit iranian. Sot duhet të themi që “Po Shqipëria është aleat i SHBA-së”, presidenti Trump sot ka qartësuar hapat në të cilat SHBA do të ecë, përshëndesim Trump për ndërhyrjen historike sa i përket asgjësimit të regjimit të iranit. SHBA e kanë mbështetur gjithmonë Shqipërinë kur ne në mënyrë të vazhdueshme kemi qenë shënjestër e sulmeve të regjimit iranian. Lëreni teatrin dhe bëni atë që duhet të bëjë çdo politikan i përgjegjshëm. Shqipëria nuk ka sot asnjë informacion zyrtar për të qenë target i këtyre sulmeve.
