Gennaro Gattuso e ka cilësuar përballjen ndaj Irlandës së Veriut si ndeshjen më të rëndësishme të karrierës së tij si trajner, duke theksuar se Italia duhet të japë maksimumin për të siguruar rikthimin në Kupën e Botës.
Trajneri italian u shpreh se prej muajsh mendon vetëm për objektivin e kualifikimit dhe se skuadra duhet të jetë gati si fizikisht, ashtu edhe mendërisht për një duel kaq delikat. Sipas tij, Italia nuk duhet ta nënvlerësojë aspak kundërshtarin, pasi Irlanda e Veriut është një ekip i fortë në duelet fizike, topat e dytë dhe lojën vertikale.
Gattuso foli edhe për gjendjen e skuadrës, duke bërë të ditur se Bastoni dhe Scamacca mbeten në dyshim, ndërsa lojtarët e tjerë janë të gatshëm. Ai zbuloi gjithashtu se Retegui do të jetë gjuajtësi i penalltive, nëse ndeshja shkon në atë pikë.
Nga ana e tij, Mateo Retegui u shfaq i bindur se Italia është gati për këtë sfidë, duke theksuar se fanella e kombëtares është gjëja më e rëndësishme në karrierën e tij. Sulmuesi tha se skuadra duhet të ruajë qetësinë, por njëkohësisht të futet në fushë me mentalitet fitues, sepse në një ndeshje kaq të rëndësishme nuk ka rezultat tjetër përveç fitores.
