Kryeministri Edi Rama ka mbledhur në “Vilën 30” dy ministrat e kabinetit të tij, Besfort Lamallarin dhe Toni Gogun.
Sipas informacioneve paraprake, i pari që ka mbërritur në takim ka qenë ministri i Brendshëm Besfort Lamallari, i cili është takuar kokë më kokë me kreun e qeverisë. Takimi mes tyre ka nisur rreth orës 09:00 dhe ka zgjatur për më shumë se një orë e gjysmë.
Më pas, në ambientet e Vilës 30 është parë të hyjë edhe ministri i Drejtësisë, Toni Gogu, çka ka shtuar interesin sa i përket çështjeve që po diskutohen mes tyre.
Ende nuk dihet nëse ky takim lidhet drejtpërdrejt me zhvillimet e fundit politike në vend apo nëse bëhet fjalë për një mbledhje rutinë në kuadër të punës së ministrisë së Brendshme, dhe asaj të Drejtësisë.
Vlen të theksohet se kjo mbledhje mes Ramës, Lamallarit dhe Gogut po mbahet paralelisht me një tjetër zhvillim të rëndësishëm, sa i përket zgjedhjes së kryepolicit të ri. Prej mëngjesit të sotëm në ambientet e Ministrisë së Brendshme janë duke u zhvilluar intervistat me kandidatët për pasuesin e Ilir Prodës në krye të Policisë së Shtetit.
Komisioni i ngritur pranë Ministrisë së Brendshme, i përbërë nga zv.ministrja Silva Caka, sekretarja e Përgjithshme Kledia Ngjela dhe kreu i AMP-së Eduart Merkaj, ka nisur shqyrtimin e detajuar të dosjeve dhe zhvillimin e intervistave me kandidatët në garë.
Në total, për këtë post të rëndësishëm kanë aplikuar 16 kandidatë. Dy prej tyre, Ejona Gurbardhi dhe Suela Sulkaj, të cilat nuk vinin nga radhët e Policisë së Shtetit, janë skualifikuar që në fazën e verifikimit paraprak.
Lista e kandidatëve në garë:
Afrim Tafa
Alfred Çepe
Arjanit Arapi
Elidon Çela
Gentian Berberi
Gentjan Shehaj
Idajet Faskaj
Lorenc Panganika
Neritan Nallbati
Pëllumb Seferi
Rebani Jaupi
Saimir Boshnjaku
Skënder Hita
Tonin Vocaj.
