Këtë të martë do të mbahet seanca e dytë e gjyqit në themel për kryebashkiakun e Tiranës, Erion Veliaj, bashkëshorten e tij Ajola Xoxa, si dhe për 28 persona dhe shoqëri të përfshira në këtë dosje.
Në seancën e parë të zhvilluar më 9 mars, Veliaj arriti të siguronte një fitore pasi GJKKO pranoi kërkesën e tij të përsëritur për t’u njohur me të gjitha aktet e dosjes hetimore.
Megjithatë, ai nuk ishte i pranishëm në seancë dhe u përfaqësua nga avokatja e tij, Valentina Teodoresku. Përmes një deklarate, Veliaj u shpreh se ende nuk ishte zhvilluar seanca paraprake dhe, sipas tij, procesi nuk mund të kishte kaluar në fazën e gjykimit në themel.
Vetëm një ditë pas miratimit të kërkesës së tij nga GJKKO, SPAK, përmes agjentëve të Byrosë Kombëtare të Hetimit, i dorëzoi Veliajt 28 mijë faqe nga 72 fashikujt e dosjes, në funksion të së drejtës së tij për mbrojtje efektive.
Në seancën e parë në themel mungoi edhe bashkëshortja e tij, Ajola Xoxa, e cila u përfaqësua nga avokati Maks Haxhia. Ky i fundit informoi gjykatën se ajo është shtatzënë dhe për arsye shëndetësore, i është ndaluar lëvizja nga mjeku.
Gjykata e Posaçme vendosi më 9 shkurt kalimin për gjykim të dosjes në ngarkim të Erion Veliajt, Ajola Xoxës, si dhe 28 personave të përfshirë në dosje. Kryebashkiaku i Tiranës ndodhet në qeli që prej 10 shkurtit 2025, ndërsa SPAK dërgoi kërkesën për të kaluar dosjen për gjykim 5 muaj më parë.
