Avokati i Popullit ka reaguar pas protestës së opozitës të zhvilluar ditën e diel në Tiranë, duke bërë me dije se ka ndjekur nga afër të gjithë itinerarin e tubimit. Në një raport paraprak, institucioni ngre shqetësime për raportime mbi dhunë policore dhe mungesë të protokolleve të qarta në përdorimin e gazit lotsjellës, ndërsa thekson se verifikimet vijojnë.
Grupi i punës ka zhvilluar vizita në spitale dhe komisariate, ku janë intervistuar protestues të ndaluar apo të lënduar. Sipas të dhënave paraprake, të paktën 12 persona madhorë janë ndaluar, ndërsa 4 të mitur janë liruar pas marrjes në pyetje. Ndërkohë, një ankesë për ushtrim dhune nga ana e policisë është administruar dhe ka nisur hetimi përkatës, teksa raporti i plotë pritet të publikohet në përfundim të procedurave.
Raport paraprak i Avokatit të Popullit mbi zhvillimin e protestës në kryeqytet:
Raportime për dhunë policore dhe mungesë protokollesh në përdorimin e gazit lotësjellës
Avokati i Popullit monitoroi përgjatë gjithë itinerarit protestën e opozitës të zhvilluar ditën e diel në kryeqytet.
Grupi i punës së institucionit vizitoi spitalet dhe komisariatet për të parë dhe intervistuar protestuesit e ndaluar apo të lënduar.
Nga të dhënat paraprake, të paktën 12 persona në moshë madhore janë ndaluar, ndërsa 4 të mitur u lanë të lirë pas marrjes në pyetje.
Në Spitalin e Traumës, ekipi i Avokatit të Popullit administroi ankesën e një protestuesi që raportoi ushtrim dhune nga ana e policisë, për të cilën ka nisur hetimi përkatës.
Raporti e detajuar do të publikohet në përfundim të hetimit administrativ.
Avokati i Popullit gjen rastin të theksojë se ndërsa inkurajon vetëm tubimet paqësore, i bën thirrje forcave të rendit për vetëpërmbajtje dhe profesionalizëm, pavarësisht dinamikës së protestës.
Gjithashtu thekson domosdoshmërinë për transparencë mbi protokollet e përdorura nga policia për përshkallëzimin e forcës dhe përdorimin e mjeteve për shpërndarjen e turmave si gazi lotsjellës apo uji.
