Agjenti i Enzo Fernandez, Matías Toranzo, ka folur për herë të parë rreth zërave që e lidhin mesfushorin argjentinas të Chelsea-t me një kalim të mundshëm te Real Madridi.
Në një prononcim për Erem News, Toranzo ka mohuar se ekziston aktualisht diçka konkrete, duke i cilësuar raportimet vetëm si thashetheme të merkatos.
“E vërteta është se ende nuk ka asgjë… janë vetëm zëra. Maji dhe qershori janë ende larg, është shumë herët,” është shprehur agjenti i mesfushorit argjentinas.
Në javët e fundit, forma jo e mirë e Chelsea-t, mungesa e rezultateve të mëdha sportive dhe mundësia që klubi londinez të mbetet jashtë Champions League sezonin e ardhshëm, kanë shtuar spekulimet për të ardhmen e Enzos. Kjo situatë ka bërë që emri i tij të lidhet me disa klube të mëdha europiane, mes tyre edhe Real Madridi.
Megjithatë, agjenti i lojtarit ka hedhur poshtë edhe zërat për një largim të afërt, duke mohuar gjithashtu se ka ndonjë ofertë nga Arabia Saudite.
Për momentin, e ardhmja e Enzo Fernandez mbetet e hapur vetëm në nivel spekulimesh, ndërsa çdo lëvizje konkrete duket se është ende larg.
