Vendet evropiane duhet të përgatiten për sulme nga aktorë jo-shtetërorë, përfshirë rrjete kriminale, grupe terroriste dhe sulmues të vetmuar, ndërsa teknologjia e dronëve po avancon. Kështu ka paralajmëruar presidenti ukrainas Volodymyr Zelensky.
Pas një vizite në Mbretërinë e Bashkuar, Zelensky tha se nuk është më vetëm “një i çmendur i pasur si Putini” që mund të përballojë sulme masive, ndërsa u tregoi deputetëve dhe lordëve britanikë teknologjinë më të fundit.
Zelensky tha se regjimet në Moskë dhe Teheran janë “vëllezër në urrejtje”, me Rusinë që përdor dronët Shahed të dizajnuar nga Irani, si dhe variantet e saj, për të sulmuar infrastrukturën kritike në Ukrainë.
Vizita e tij në Mbretërinë e Bashkuar erdhi pasi Keir Starmer tha se Perëndimi nuk duhet të “humbasë fokusin” tek Ukraina, mes shqetësimeve se konflikti në Iran ka ringjallur ekonominë e dobësuar të Rusisë duke rritur të ardhurat nga nafta dhe se Kievi mund të mbetet pa sisteme mbrojtjeje ajrore që po dislokohen në Lindjen e Mesme.
“Putini nuk mund të jetë ai që përfiton nga konflikti në Iran, qoftë nga çmimet e naftës apo heqja e sanksioneve. Është shumë e rëndësishme të ruajmë vendosmërinë për të mbështetur Ukrainën, duke bërë gjithçka që mundemi për të dobësuar dorën e Putinit.”, ishin fjalët e tij, sipas The Guardian.
Në fjalimin e tij në Westminster, Zelensky tha: “Nuk bëhet fjalë vetëm për një shtet që nis sulme, ne duhet të jemi gati për çdo lloj goditjeje, përfshirë nga aktorë jo-shtetërorë, rrjete kriminale, grupe terroriste dhe madje edhe sulmues të vetmuar që mund të kenë akses në këto teknologji.
Me përhapjen e dronëve, sulmet masive nuk kushtojnë më miliarda. Kushtojnë shumë më pak. Nuk është më vetëm një i çmendur i pasur si Putini që mund ta përballojë këtë, fatkeqësisht, por edhe tani ai ende po merr para ndërsa sanksionet e tij po hiqen.”
Zelensky sugjeroi se konflikti në Lindjen e Mesme nuk është “një luftë e largët” për Ukrainën për shkak të teknologjisë ushtarake të ndarë mes Iranit dhe Rusisë.
Ai shtoi: “Nëse e keqja fiton, evolucioni i luftës do të kapërcejë çdo distancë në tokë, asnjë oqean nuk do të ndihmojë, asnjë shkretëtirë, asnjë mal… regjimet në Rusi dhe Iran janë vëllezër në urrejtje, dhe prandaj janë vëllezër në armë. Ne nuk duam që asnjë regjim i tillë të kërcënojë Europën apo partnerët tanë. Ne nuk themi që Rusia nuk mund të inovojë. Mundet, por e bën për të vrarë, për të gjymtuar, për të shkatërruar. Kjo është ajo që bën më mirë, ashtu si edhe ajatollahët, e shihni në mënyrën se si Shahedët janë zhvilluar nga diçka si armë për bombardime në dronë më të shpejtë, më vdekjeprurës dhe tashmë duke përdorur edhe inteligjencën artificiale.”
Ai tha se Ukraina mund të ofrojë mbështetje mbrojtëse, përfshirë ekipe interceptimi dhe radarë, për aleatët perëndimorë me objekte ushtarake dhe civile në Lindjen e Mesme që kanë qenë nën sulme nga dronët iranianë.
“Ky është lloji i përforcimit që ne ofrojmë, dhe së shpejti mund të jetë i nevojshëm në gjithë Europën. Dronët mund të lëshohen jo vetëm nga toka, por edhe nga anijet në det. Sulmet me rreze të gjatë nuk janë më të rralla,” tha ai.
