Trajneri i Real Madridit, Álvaro Arbeloa, ka dalë para mediave në prag të ndeshjes së kthimit ndaj Manchester Cityt në Ligën e Kampionëve, duke dhënë lajme të rëndësishme për gjendjen e disa prej lojtarëve kryesorë të skuadrës. Tekniku spanjoll konfirmoi se Kylian Mbappé është rikuperuar dhe është i gatshëm për ndeshjen, ndërsa Jude Bellingham nuk do të jetë në dispozicion për të luajtur, edhe pse ka udhëtuar me ekipin.
“Mbappé tani është i gatshëm. Do ta shihni nesër”, deklaroi Arbeloa, duke lënë të kuptohet se sulmuesi francez pritet të ketë rol në sfidën ndaj anglezëve. Për Bellingham, ai sqaroi se mesfushori anglez kërkoi vetë të ishte pranë skuadrës për të qëndruar i lidhur me grupin, edhe pse nuk është ende në gjendje për të zbritur në fushë.
Sa i përket planit të ndeshjes, Arbeloa theksoi se Real Madridi do të futet në fushë me të njëjtën qasje si në takimin e parë, me objektivin e vetëm për të fituar. Sipas tij, skuadra duhet të tregojë edhe më shumë përulësi, ambicie, sakrificë dhe nivel të lartë loje përballë një kundërshtari kaq të fortë si Manchester City.
Tekniku madrilen u ndal edhe te ndikimi i Mbappé në lojën e skuadrës, duke nënvizuar se francezi ofron cilësi ndryshe nga lojtarë të tjerë si Brahim, por në të njëjtën kohë ka inteligjencën dhe lëvizjet e duhura për t’u përshtatur me hapësirat që krijon kundërshtari. Arbeloa u shpreh i lumtur që mund ta ketë sërish në dispozicion.
Ai komentoi gjithashtu edhe formën e Federico Valverdes, duke theksuar se uruguaiani mund të luajë në çdo repart dhe po kalon një moment shumë të mirë. Sipas Arbeloas, edhe me rikthimin e Bellingham dhe Mbappé, Real Madridi duhet të vazhdojë të përfitojë nga versioni më i mirë i Valverdes.
Në konferencën para ndeshjes, Arbeloa foli edhe për rolin e lojtarëve të rinj dhe të akademisë, duke theksuar se në skuadër nuk ka vend për yje të paprekshëm, por vetëm për futbollistë që e fitojnë vendin në fushë me paraqitje të mira. Ai vlerësoi gjithashtu Arda Güler për golin ndaj Elches dhe la të kuptohet se turku mund të ketë sërish një rol të rëndësishëm.
Në fund, trajneri i Real Madridit tregoi respekt maksimal për Pep Guardiolën dhe vendimin e Manchester Cityt për të mos u stërvitur një ditë para ndeshjes, duke thënë se anglezët janë një skuadër që njihet në perfeksion dhe funksionon pothuajse instinktivisht pas kaq shumë vitesh së bashku.
