Tottenham ka marrë një pikë me shumë peshë në transfertën ndaj Liverpoolit, duke barazuar 1-1 në “Anfield” falë golit të Richarlison në minutën e 90-të. Një rezultat që i jep frymëmarrje skuadrës londineze dhe, të paktën për momentin, lehtëson disi presionin mbi trajnerin Igor Tudor.
Përballja nisi më mirë për vendasit, që kaluan në avantazh në minutën e 18-të me një goditje dënimi të realizuar nga Dominik Szoboszlai. Mesfushori hungarez goditi nga distanca, ndërsa portieri Guglielmo Vicario arriti ta prekë topin, por jo ta ndalë atë të përfundonte në rrjetë. Ishte një tjetër episod i vështirë për portierin e Tottenhamit, i cili vazhdon të jetë në qendër të kritikave.
Liverpool e administroi epërsinë, por sërish nuk arriti ta mbyllte ndeshjen. Pavarësisht disa lëvizjeve nga stoli dhe përpjekjeve për të rritur ritmin në fazën sulmuese, skuadra e Arne Slot prodhoi pak raste të pastra nga loja e hapur dhe la gjithçka të hapur deri në fund.
Tottenham, edhe pse me mungesa të shumta dhe një stol të kufizuar, nuk hoqi dorë. Në minutën e 90-të, Randal Kolo Muani mbrojti mirë topin përballë Virgil van Dijk dhe shërbeu për Richarlison, i cili mposhti Alisson Becker për të vendosur baraspeshën 1-1. Goli u festua me entuziazëm të madh nga Tudor, që mori pikën e parë pas pesë ndeshjesh në krye të skuadrës.
Ky barazim nuk e zgjidh krizën e Tottenhamit, por i jep ekipit një pikë të rëndësishme në luftën për mbijetesë, duke e ngjitur një pikë mbi zonën e rënies nga kategoria. Në anën tjetër, Liverpool humbet një tjetër mundësi për të forcuar pozitat në garën për një vend në Champions League dhe largohet nga fusha mes pakënaqësisë së tifozëve.
Në planin individual, Szoboszlai vazhdoi sezonin e tij shumë pozitiv, duke shënuar një tjetër gol spektakolar nga goditja e dënimit, ndërsa Richarlison ishte njeriu i momentit për Tottenhamin me golin që ndryshoi fatin e sfidës në sekondat e fundit.
