Përballja e shumëpritur mes kampiones së Europës dhe kampiones së Amerikës së Jugut nuk do të zhvillohet. Finalissima 2026, që ishte parashikuar të vinte përballë Spanjën dhe Argjentinën, është anuluar zyrtarisht pas dështimit të negociatave mes UEFA-s dhe Federatës Argjentinase të Futbollit (AFA).
Sipas njoftimit zyrtar të UEFA-s, janë bërë disa përpjekje për të shpëtuar zhvillimin e kësaj sfide prestigjioze, por palët nuk arritën të gjenin një marrëveshje përfundimtare mbi vendin dhe datën e ndeshjes.
Opsioni i parë i propozuar ishte që takimi të luhej në Madrid, në stadiumin “Santiago Bernabéu”, me ndarje të barabartë të biletave mes tifozëve të të dyja përfaqësueseve. Megjithatë, pala argjentinase e refuzoi kategorikisht këtë mundësi.
Më pas, u hodh në tryezë edhe ideja që Finalissima të zhvillohej me sistem vajtje-ardhje, në Madrid dhe Buenos Aires, përpara turneve madhorë të vitit 2028. Edhe ky propozim nuk u pranua nga Argjentina.
Si alternativë të fundit, UEFA propozoi që ndeshja të luhej në një stadium neutral në Europë, më 27 ose 30 mars. Por edhe në këtë rast nuk pati dakordësi. Argjentina këmbënguli që sfida të zhvillohej vetëm më 31 mars ose pas Kupës së Botës, ndërsa Spanja kishte tashmë angazhime të tjera të programuara për ato data.
Në këto kushte, mungesa e kompromisit e bëri teknikisht të pamundur organizimin e Finalissima 2026, duke sjellë kështu anulimin e një prej dueleve më të pritura në futbollin ndërkombëtar.
