Një trokitje në derën e drunjtë dhe dy zonja që përshëndeten ngrohtë me njëra-tjetrën. Shtëpia ndodhet në lagjen ‘Kala’ në Elbasan, qytetin që e feston Ditën e Verës në një mënyrë krejt të veçantë.
Të dyja i drejtohen kuzhinës për të gatuar ëmbëlsirën tradicionale të Ditës së Verës.
“Jam Nebi. Ndodhemi në lagjen ‘Kala’ në një shtëpi tradicionale të z. Petrit Isufi. Kemi ardhur këtu që të pëgatisim ballokumet e Ditës së Verës bashkë me vajzën e z. Petrit, Kristinën dhe mbesën tonë”, prezantohet njëra prej zonjave.
Menjëherë, të tria i përvishen punës. Tretin gjalpin që e lënë të ftohet paksa në një enë bakri para se të vijojnë me hapin e radhës.
Si fillim marrim 1 kile sheqer. Janë 7 kokrra vezë. Do t’i rrahim. Çdo vezë nga 5 minuta, do të hidhen një e nga një. Ky është sekreti. Tani do të fillojmë të hedhim miellin e misrit pak e nga pak”, thotë Nebi duke zbuluar një prej sekreteve të recetës së ballokumes.
“Sekreti i ballokumes është hiri. Marrim hi të pastër, e ziejmë me ujë, e lëmë disa orë të kullojë mirë dhe i fusim 3 lugë me hi”, shton Nebi ndërsa më pas në një tepsi të madhe vendosen topthat e verdhë të ballokumes, gati për t’u pjekur.
“Stufa duhet të ndizet 10 minuta para deri në 175-180 gradë dhe do të piqen për 30 minuta. Pasi t’i nxjerrim nga pjekja, do t’i lëmë çerek ore sa të ftohen”, shpjegon Nebi.
Sapo ballokumet tashmë të pjekura dhe tamam si një disk dalin nga furra dhe ftohen, vogëlushja nuk u reziston dhe provon menjëherë një prej tyre.
“Gëzuar Ditën e Verës! Ardhtë një verë plot shëndet e begati për të gjithë!”, uron Nebi.
Videoja është ndarë në rrjetet sociale të kryeministrit Rama: “Mirëmëngjes, dhe nga qyteti që na sjell verën, ju uroj një fundjavë plot diell!”, shkruan ai krah postimit.
