Rodrygo i është nënshtruar me sukses ndërhyrjes kirurgjikale në gjurin e djathtë, pas dëmtimit të rëndë që pësoi një javë më parë në ndeshjen ndaj Getafes. Operacioni u krye këtë mëngjes nga dr. Leyes dhe, sipas raportimeve, gjithçka ka shkuar mirë.
Sulmuesi brazilian kishte pësuar këputje të ligamentit të kryqëzuar të përparmë (ACL) dhe dëmtim të meniskut anësor, një nga dëmtimet më serioze për një futbollist. Klubi priti që të ulej ënjtja dhe që zona të ishte në gjendjen më të mirë të mundshme para se të merrej vendimi final për operacionin.
Dëmtimi ndodhi në minutën e 66-të, pas një dueli me Adrián Liso. Rodrygo mori topin në krahun e majtë, vendosi këmbën për të shpërthyer në sprint dhe gjuri “i mbeti”, duke ndjerë menjëherë dhimbje të forta. Ai çaloi, u rrëzua në fushë dhe qëndroi disa sekonda në dhimbje, por më pas u ngrit dhe vazhdoi të luante edhe për më shumë se 30 minuta, edhe pse ende nuk është e qartë nëse dëmtimi ishte i plotë që në atë moment apo u përkeqësua gjatë vazhdimit të lojës.
Të nesërmen, gjendja u rëndua dhe pas ekzaminimeve mjekësore u konfirmua diagnoza: këputje e ACL-së dhe meniskut lateral në gjurin e djathtë. Një lajm shkatërrues për lojtarin dhe Real Madridin.
Në atë kohë, Rodrygo reagoi edhe në rrjetet sociale me një mesazh emocional: “Ndoshta jeta ka qenë pak mizore me mua kohët e fundit… por edhe pse është një moment i vështirë, premtoj se nuk do të ndalem… është vetëm ‘shihemi së shpejti’.”
Tani, pas operacionit të suksesshëm, nis periudha e rikuperimit. Parashikohet që Rodrygo të jetë jashtë fushave rreth një vit, ndërsa rikthimi gradual në stërvitje mund të ndodhë pas afërsisht 10 muajsh, në varësi të ecurisë së rehabilitimit.
