Trajneri i Atlético Madrid, Diego Pablo Simeone, ka minimizuar rolin e skuadrës së tij si favorite për përballjen ndaj Tottenham në 1/8-at e Champions League. “Los Rojiblancos” do të presin ekipin anglez këtë të martë në ndeshjen e parë të këtij raundi.
Tekniku argjentinas theksoi se përballja do të jetë shumë e vështirë dhe se Tottenham mbetet një kundërshtar i fortë, pavarësisht formës në kampionat. Ai kujtoi gjithashtu se skuadra londineze ka përfunduar në vendin e katërt në fazën e mëparshme të Champions League.
“Nuk mendoj se jemi favoritë. Nuk e di pse thuhet kjo. Në fund, kur ekipet hyjnë në fushë, askush nuk mendon për renditjen apo tabelën. Futbollistët duan vetëm të fitojnë ndeshjen,” u shpreh Simeone.
Trajneri i Atlético Madrid vlerësoi edhe stilin ofensiv të Tottenham dhe paralajmëroi se Premier League është kampionati me ritmin më të lartë të lojës në Evropë.
“Premier League ka një ritëm shumë më të lartë. Loja rrjedh më shpejt, ka më shumë aksione dhe më pak ndërprerje. Është liga me ritmin më të shpejtë të lojës,” shtoi ai.
Në fund, Simeone foli edhe për Conor Gallagher, ish-lojtarin e Atlético Madrid që tani luan te Tottenham, duke e vlerësuar për punën dhe përkushtimin e tij në fushë.
“Është një lojtar shumë punëtor dhe i rrezikshëm kur futet nga prapa. Mund të luajë në disa pozicione dhe gjithmonë jep maksimumin për ekipin,” përfundoi trajneri argjentinas.
