Real Madridi po përgatitet për përballjen e rëndësishme ndaj Manchester Cityt në ndeshjen e parë të 1/8-ave të Champions League, por skuadra madrilene do të ketë disa mungesa të rëndësishme.
Kylian Mbappé dhe Álvaro Carreras nuk do të jenë të disponueshëm për këtë sfidë. Mbrojtësi galician ka pësuar një dëmtim muskulor në pulpën e këmbës së djathtë, pas një goditjeje të fortë që mori në ndeshjen kundër Getafes një javë më parë. Ai pritej të rikthehej në stërvitje me ekipin në fillim të javës, por nuk ia doli, ndaj pritet të mungojë edhe disa ditë të tjera. Në skenarin më optimist, Carreras mund të jetë gati për ndeshjen e kthimit në Manchester.
Edhe Mbappé nuk është ende në gjendje të luajë. Sulmuesi francez u rikthye nga disa ditë në Paris dhe ka zhvilluar vetëm stërvitje në palestër dhe individuale në fushë, pa punuar ende me topin.
Në anën tjetër, një lajm pozitiv për madrilenët është rikthimi i Antonio Rüdiger, i cili është stërvitur normalisht dhe pritet të jetë titullar në përballjen ndaj Manchester Cityt, ku do të ketë për detyrë të ndalë sulmuesin norvegjez Erling Haaland.
Ndërkohë, trajneri Álvaro Arbeloa rikuperon edhe disa lojtarë që munguan në ndeshjen e fundit ndaj Celta Vigos, si Huijsen, Mastantuono dhe Camavinga.
Pavarësisht mungesave, atmosfera në Valdebebas mbetet e fokusuar dhe intensive, pasi Real Madridi synon të përgatitet sa më mirë për një nga sfidat më të rëndësishme të sezonit në Champions League.
