AC Milan fitoi derbin e madh të qytetit ndaj Inter Milan falë një goli vendimtar të Pervis Estupiñán në fundin e pjesës së parë, duke rihapur garën për titull në Serie A. Kuqezinjtë fituan 1-0 në San Siro dhe tani e kanë ngushtuar diferencën me kryesuesit në vetëm shtatë pikë.
Skuadra e drejtuar nga Massimiliano Allegri zhvilloi një ndeshje të fortë dhe arriti të shfrytëzojë momentin e saj më të mirë në fundin e pjesës së parë. Pas një aksioni të shpejtë, Youssouf Fofana shërbeu në krah për Estupiñán, i cili i shpëtoi mbulimit të Luis Henrique dhe goditi fuqishëm me të majtën, duke mposhtur portierin Yann Sommer për golin që vendosi derbin.
Interi pati mundësinë më të mirë për të kaluar i pari në avantazh pak minuta më herët, kur Henrikh Mkhitaryan u gjend përballë portierit Mike Maignan, por goditja e tij ishte e dobët dhe qendrore, duke u ndalur lehtësisht nga gardiani i Milanit.
Në pjesën e dytë, Interi i drejtuar nga Cristian Chivu shtyu shumë përpara duke u vendosur në gjysmën e fushës së Milanit, por pa arritur të krijojë raste të pastra shënimi. Një tjetër mundësi e mirë iu paraqit Federico Dimarco, por ai e dërgoi topin mbi portë nga një pozicion i favorshëm.
Milani u mbrojt me kujdes dhe kërkoi kundërsulmin, ndërsa në një rast të mirë Rafael Leão nuk arriti të shfrytëzonte një asist të Christian Pulisic.
Në minutat shtesë, Interi pretendoi për një penallti dhe madje arriti të dërgojë topin në rrjetë pas një goditjeje nga këndi me Carlos Augusto, por goli u anulua pasi arbitri kishte ndërprerë më parë lojën.
Me këtë fitore, Milani jo vetëm që forcon vendin e dytë në renditje, por edhe zgjat serinë pozitive në derbi ndaj Interit në shtatë ndeshje radhazi (5 fitore dhe 2 barazime). Kuqezinjtë gjithashtu përsërisin një statistikë që i bën tifozët të ëndërrojnë: hera e fundit kur Milani fitoi dy derbi në një sezon ishte në kampionatin 2010-2011, kur skuadra e drejtuar nga Allegri fitoi titullin kampion.
