Real Madridi ka hedhur poshtë zërat për një interesim ndaj mesfushorit të Manchester Cityt, Rodri, në kuadër të planeve për merkaton e verës së vitit 2026.
Sipas raportimeve të Diario AS, edhe pse klubi madrilen po kërkon mënyra për të përforcuar mesfushën, fituesi i Topit të Artë 2024 nuk bën pjesë në listën e shkurtër të drejtuesve. Madje, sipas të njëjtave burime, e vetmja herë kur Rodri pritet të jetë në “Santiago Bernabeu” është si kundërshtar në raundin e ardhshëm të Ligës së Kampionëve.
Arsyeja kryesore e refuzimit të këtij transferimi lidhet me strategjinë aktuale të Real Madridit, i cili po synon lojtarë më të rinj. Po ashtu, në vendim kanë ndikuar edhe pasojat e dëmtimit serioz që spanjolli pësoi vitin e kaluar. Pavarësisht se “Los Blancos” e kanë vlerësuar gjithmonë lart talentin e liderit të kombëtares së Spanjës, klubi tani duket i fokusuar te profile të tjera për të ardhmen.
Ndërkohë, vetë lojtari ka kontratë me Manchester Cityn deri në vitin 2027 dhe po shqyrton ofertën e klubit anglez për rinovimin e marrëveshjes.
Gjatë këtij sezoni, fituesi i Topit të Artë ka zhvilluar 24 ndeshje me fanellën e Manchester Cityt, duke shënuar 2 gola.
