Deputeti i Partisë Socialiste, Erion Braçe, ka reaguar ashpër ndaj paralajmërimeve për një rritje të mundshme të çmimit të naftës në Shqipëri, të lidhur me zhvillimet e fundit në Lindjen e Mesme.
Braçe akuzon operatorët e tregut të hidrokarbureve për abuzim dhe përpjekje për të rritur çmimet në mënyrë të pajustifikuar.
Në një postim në rrjete sociale, Braçe shprehet se përfaqësues të tregut të karburanteve, të cilët sipas tij veprojnë si një “kartel”, kanë paralajmëruar një rritje të çmimit me 20 lekë për litër brenda 48 orëve dhe deri në 40 lekë në vijim. Sipas tyre, kjo rritje lidhet me lëvizjet në bursat ndërkombëtare.
Megjithatë, deputeti socialist e kundërshton këtë argument, duke theksuar se çmimi i naftës në pompë është aktualisht 173 lekë për litër dhe ka mbetur i pandryshuar prej rreth një viti, pavarësisht luhatjeve në bursë apo zhvlerësimit të monedhave kryesore si dollari dhe euro.
Braçe paralajmëroi se, nëse nuk merren masa të shpejta, qytetarët dhe vetë qeveria do të përballen me koston e rritjes së çmimeve, ndërsa operatorët e tregut do të përfitojnë nga situata.
Ai rikujtoi gjithashtu se Bordi i Hidrokarbureve, i krijuar gjatë periudhës së luftës në Ukrainë për të monitoruar çmimet e karburanteve, nuk është shpallur ndonjëherë antikushtetues. Sipas tij, nëse funksionon në mënyrë profesionale dhe me fokus interesin publik, ky mekanizëm mund të shërbejë për të frenuar abuzimet në tregun e karburanteve.
“Si, si, do rrisni çmimin e naftës?? Karteli i hidrokarbureve që vepron si shoqatë, paska thënë që do rrisë çmimin me 20 lekë për 48 orë, deri në 40 lekë për litër në vijim!
Arsyeja e tyre – bursa!!
Kur i toleron, këta i bëjnë të gjitha, të bëjnë edhe për budalla!
Çmimi i naftës sot në pompë është 173 lekë; është i tillë prej një viti e nuk ka lëvizur një ditë të vetme!
Ndryshoi bursa, u rrënua dollari e euro dhe çmimi i këtyre nuk ndryshoi, zero, asnjë qindarkë! Tani çmimi do ndryshojë për 48 orë nga lufta?!
Ua thashë edhe kolegëve të mi në Partinë Socialiste sot në mëngjes: kur abuzimi ulëret, kundërmasa duhet të jetë e shpejtë dhe efektive!
Ndryshe ne do paguajmë abuzimin si qytetarë e si qeveri, këta thjesht do pasurohen!
E fundit gjë; Bordi i Hidrokarbureve që u përdor gjatë kohës së luftës në Ukrainë nuk është shpallur antikushtetues ndonjëherë! Nëse do jetë profesional dhe me fokus interesin publik, mund të jetë një nga kundërmasat ndaj abuzimit.”, shkruan Braçe.
