Dibër- Një incident i rëndë është shënuar këtë të mërkurë në Dibër, ku dy efektivë të forcave “Shqiponja” kanë mbetur të plagosur gjatë një operacioni për kapjen e një personi të shpallur në kërkim.
Paraprakisht ngjarja është shënuar në momentin kur forcat e policisë janë futur në një banesë për të arrestuar autorin.
Gjatë ndërhyrjes, personi i cili ishte në shënjestër të aksionit ka shtyrë nga lartësia policin Gentian Meda dhe kolegun e tij Bilal Gjapi.
Meda është nisur me helikopter në Tiranë për shkak të dëmtimeve që ka marrë në kokë, ndërkohë Gjapi raportohet se ka thyer këmbën.
Nga ana tjetër raportohet se vetë i kërkuari është hedhur nga kati i dytë dhe është arratisur.
