Kreu i Partisë Demokratike Sali Berisha është paraqitur këtë të hënë në SPAK në kuadër të masës së sigurimit “detyrim paraqitje” të vendosur ndaj tij.
Berisha u prit nga një grup mbështetësish para ambienteve të SPAK, si edhe disa prej deputetëve të PD.
Ish-kryeministri Berisha përballet me akuzën për korrupsion, ndërsa dhëndri i tij, Jamarbër Malltezi dhe biznesmeni Fatmir Bektashi akuzohen për përfshirje në korrupsion dhe veprime të paligjshme për pastrimin e parave.
Por pas daljes nga SPAK, Berisha ka folur për gazetarët. Ai u pyet për sulmin me molotov ndaj Vilës së ish-diktatorit Enver Hoxha gjatë protestës së të shtunës që mbajti opozita.
Kryedemokrati refuzoi që të jepte përgjigje për këtë temë para SPAK, ndërsa shtoi se komentet mund t’i jepte nga selia e PD-së.
“Nuk do ta keqpërdor këtë tribunë këtu për të dhënë përgjigje. Këtu jap përgjigje për Altin Troplinin dhe Irenën e me 5 mbiemra. Të tjerat ju garantoj se do i përgjigjem në seli. Këtu do ta ruaj këtë profil, pasi kjo që ndodh është e pakonceptueshme.”, tha ai.
