Kryeministri Edi Rama gjatë fjalës së tij para Grupit të PS-së është shprehur se ka patur shumë persona nga administrata publike qe pasi janë hetuar kanë dalë të pafajshëm.
Ata sipas Ramës kanë mbetur me trauma dhe kanë lënë punën në shtet pasi nuk duan të firmosin me asnjë shkresë. Sipas kryeministrit disa prej tyre kurohen tek psikologu.
“Ka plot e plot të pafajshmit që kanë kaluar eksperienca traumatike në Prokurorinë e Pavarur, kanë mbaruar punë, kanë dalë të pafajshëm, e di ku janë? E kanë lënë punën në shtet ose gëzojnë një status të vetë fituar dhe të vetë pranuar nga të tjerët, nuk firmosin asnjë letër nga frika. Disa kurohen nga psikologët. Çfarë ka fituar kjo drejtësia dhe ky shtet që për hir të së vërtetës nuk i ka burimet njerëzore sa të Kinës”, tha kryeministri.
Dhe më tej theksoi se prokuroria heton për statistikat e saj dhe planet tremujore, duke i trajtuar njerëzit dhe administratën shqiptare, pasi të dyja punojnë për shtetin.
“A thua se njerëzit janë statistika dhe lëkura e tyre është asfalt për t’u shtruar planin tremujor të prokurorëve. Çfarë është ky hall kështu, hiqen njerëzit nga puna, me tufa, në orar të punës dhe mbahen atje me orë të tëra pa pyetur asnjëherë a keni ndonjë punë ju, a keni mbledhje dhe afat, se për të njëjtin shtet punojnë”, shtoi kreu i mazhorancës.
