Komiteti i Apelimit i UEFA-s ka rrëzuar apelin e Benficës. Ai nuk do të mund të luajë në “Santiago Bernabéu”
UEFA njoftoi me një deklaratë zyrtare se apeli i Benficës kundër pezullimit të përkohshëm të Gianluca Prestianni-t është refuzuar.
Në komunikatë thuhet:
“Organi i Apelimit i UEFA-s ka marrë sot vendimin e mëposhtëm: Apeli i paraqitur nga SL Benfica rrëzohet. Si rrjedhojë, vendimi i Organit të Kontrollit, Etikës dhe Disiplinës të UEFA-s, i datës 23 shkurt 2026, mbetet në fuqi.”
Deklarata vazhdon:
“Z. Gianluca Prestianni mbetet i pezulluar përkohësisht për ndeshjen e ardhshme të kompeticioneve të klubeve të UEFA-s, për të cilën përndryshe do të ishte i aktivizueshëm.”
Kjo do të thotë se Prestianni, i cili ka udhëtuar drejt Madridit, nuk do të jetë në dispozicion për ndeshjen e Benficës. Ende nuk dihet nëse ai do të jetë në “Bernabéu”, ndryshe nga Mourinho, i cili sipas AS pritet të jetë në stadium pavarësisht pezullimit.
