Real Madridi do të duhet të bëjë pa shërbimet e Dani Ceballos për një pjesë të konsiderueshme të mbetur të sezonit. Mesfushori, sipas raportimeve nga Cadena SER, do të qëndrojë jashtë fushave për afërsisht dy muaj pas një dëmtimi muskulor në pulpën e këmbës së djathtë.
Lajmi u konfirmua edhe nga klubi përmes një komunikate zyrtare: “Pas testeve të kryera sot nga shërbimet mjekësore të Real Madridit, lojtari është diagnostikuar me një dëmtim muskulor në muskulun soleus të këmbës së djathtë.”
Dëmtimi ndodhi të shtunën e kaluar, në minutat e fundit të ndeshjes kundër Osasunës, një sfidë ku Ceballos u bë protagonist për keq. Aksioni që çoi te goli i fitores së Raúl Garcías në minutën e 90-të nisi pikërisht nga këmba e tij.
Mesfushori kishte vetëm tetë minuta në fushë, pasi zëvendësoi Arda Güler, kur dha një pasim të gabuar dhe të rrezikshëm që i dha mundësinë Osasunës të nisë sulmin vendimtar. Pas ndeshjes, vetë lojtari e pranoi gabimin publikisht me një mesazh të qartë në rrjetet sociale: “Unë mbaj përgjegjësi.”
E ardhmja në dyshim
Ky dëmtim vjen në një moment delikat për spanjollin, i cili ka pasur një rol të kufizuar këtë sezon me vetëm 810 minuta lojë. Për më tepër, situata e tij kontraktuale shton pasigurinë: Ceballos ka edhe vetëm një vit kontratë me “Mbretërit”, e cila skadon më 30 qershor 2027.
