Era e fortë që ka përfshirë qytetin e Vlorës mbrëmjen e djeshme dhe gjatë orëve të natës ka shkaktuar dëme.
Rreth orës 04:00 te mëngjesit, në zonën e Pyllit të Sodës, një pishë e madhe është rrëzuar si pasojë e erërave të fuqishme, duke bllokuar plotësisht aksin rrugor që të çon drejt fshatit Zvernec.
Si pasojë e rrëzimit të pemës, një automjet që po qarkullonte në atë segment rrugor është përplasur me pishën e rënë në rrugë. Nga aksidenti janë regjistruar vetëm dëme materiale, ndërsa fatmirësisht nuk ka pasur persona të lënduar.
Në vendngjarje kanë mbërritur menjëherë forcat e zjarrfikëses së Vlorës, të cilat kanë bërë prerjen dhe largimin e pishës nga rruga, duke bërë të mundur normalizimin e qarkullimit në këtë aks.
