Kryetari i Grupit Parlamentar të PD, Gazment Bardhi tha se opozita është kundër kalendarit të punimeve të parlamentit, pasi sipas tij me urgjencë duhet të futet heqja e imunitetit të Belinda Ballukut.
Në fjalën e tij në Parlament, Bardhi akuzoi mazhorancën se prej dy muajsh po pengojnë hetimet e Prokurorisë së Posaçme.
Ai tha se Kuvendi nuk mund të vazhdojë normalisht punën dhe të bëjë sikur nuk ka ndodhur asgjë me rastin e Ballukut.
“Futja me urgjencë e kërkesës së prokurorisë për të hequr imunitetin e Belinda Ballukut. Na thatë pasi skadoi tre javët e kërkuara që do presim vendimin e gjykatës kushtetuese. Për dy muaj i mbushët kokën shqiptarëve që një ministër nuk mund të pezullohet se ka imunitet. Morëm përgjigje nga GJK që pezullimi nuk hyn në imunitetin e ministrave. Më pas nxorët një tjetër justifikim që do presim zbardhjen e vendimit të GJK. Për dy muaj jeni bërë pengesë për hetimin e korrupsionit ndaj zyrtarëve të lartë. Mos u bëni hipokritë. Ky kuvend ka dështuar të përmbushë një mision kushtetues. Deri në atë moment ky Kuvend nuk mund të funksionojë normalisht dhe as të na njoftimi që përmes një ligji keni vendosur të mbroni kryeministrin dhe ministrin”, deklaroi Bardhi.
Po ashtu, ai i kujtoi Peleshit nismën e PS për ndryshimet ligjore, duke deklaruar se po mbrojne me ligj kryeministrin dhe ministrat.
“Jeni i vetmi vend në botë që miratoni një ligj për të mbrojtur veten. Në kalendar duhet të fusni me urgjencë heqjen e imunitetin, ti hapni rrugë hetimit të prokurorisë që të shkojë si i barabartë. Mos provokoni qytetarët dhe opozitën”, tha kryetari i grupit parlamentar të PD.
