Detaje tronditëse kanë dalë në lidhje me vrasjen e Artur Tushit, 44-vjeçarit shqiptar, i cili u qëllua 11 herë jashtë qendrës tregtare Santafé në Medellín, Kolumbi, në tetor të vitit të kaluar. Hetuesit kanë zbuluar se autorët e kësaj vrasjeje dyshohet se janë të lidhur me grupin kriminal “La Oficina Premium”, një organizatë e njohur për vrasje me pagesë të individëve me profil të lartë, sidomos të huaj.
Vrasja e Tushit do të ishte pjesë e një operacioni për të eliminuar aktivitetin e tij kriminal, që dyshohet se lidhet me trafikun e qenieve njerëzore dhe narkotikëve. Kjo ngjarje ka prekur një rrjet më të gjerë të kriminalitetit, ku janë përfshirë grupe të ndryshme, përfshirë ato shqiptare, ekuadoriane dhe kolumbiane.
Tashi, një viktimë e cila u qëllua ndërsa kthehej në shtëpi, tregon për një trend në rritje të vrasjeve të të huajve në Medellín në vitet e fundit. Një tjetër rast i njohur është ai i Horacio Pérez Ledezma, 54 vjeç, i vrarë në një restorant në Provenza, si dhe dy kanadezë, Jonathan Christopher Acevedo García dhe Jesse Marcel Arrigo, të cilët u vranë në vende të ndryshme të qytetit.
Kryetari i bashkisë, Federico Gutiérrez, ka pohuar se “La Oficina Premium” ka një prani ndërkombëtare dhe është përgjegjëse për vrasje të ngjashme në vende si Meksika, Republika Dominikane dhe Kili. Sipas hetimeve, kjo organizatë përdor linja telefonike ndërkombëtare dhe rrjete financiare për të organizuar aktivitetet e saj kriminale, duke përfshirë pagesat që variojnë nga 400,000 deri në 500,000 dollarë për ekzekutimet, në varësi të profilit të viktimës.
Në këtë kontekst, deri tani janë arrestuar nëntë individë të dyshuar të grupit, të cilët janë nën hetim për vrasje, trafik armësh dhe aktivitete të tjera të paligjshme. Autoritetet vazhdojnë hetimet për të zbuluar lidhjet ndërkombëtare dhe implikimet penale të grupit “La Oficina Premium”, në një përpjekje për të ndaluar krimin e organizuar në këtë rajon.
