Ish-sekretarja amerikane e Shtetit, Hillary Clinton, ka akuzuar administratën e presidentit Donald Trump për “cover-up” në lidhje me mënyrën se si po trajtohen dosjet që lidhen me financierin e ndjerë dhe të dënuarin për abuzime seksuale, Jeffrey Epstein.
Në një intervistë për BBC në Berlin, ku mori pjesë në forumin vjetor World Forum, Clinton u shpreh: “Nxirrini dosjet. Po zvarriten me qëllim”.
Deklarata e saj vjen pasi Departamenti Amerikan i Drejtësisë (DoJ) publikoi miliona faqe dokumentesh të reja lidhur me hetimet ndaj Epstein.
Zëvendësprokurori i përgjithshëm konfirmoi se rreth tre milionë faqe nuk janë bërë publike për shkak të përmbajtjes së ndjeshme, përfshirë materiale mjekësore personale dhe prova që mund të cenojnë hetime të hapura.
Thirrje për dëshmi publike
Clinton tha se “çdokush që thirret për të dëshmuar duhet të dëshmojë”, duke iu referuar edhe presionit ndaj Andrew Mountbatten-Windsor për t’u paraqitur para një komisioni të Kongresit amerikan.
Vetë Hillary Clinton dhe ish-presidenti Bill Clinton kanë rënë dakord të dëshmojnë para Komisionit të Mbikëqyrjes, pas kërcënimit për t’i shpallur në përbuzje të Kongresit. Bill Clinton pritet të dëshmojë më 27 shkurt, ndërsa Hillary një ditë më herët. Ata kanë kërkuar që seanca të jetë publike dhe jo me dyer të mbyllura.
“Ne nuk kemi asgjë për të fshehur. Kemi kërkuar vazhdimisht publikimin e plotë të dosjeve. Drita e diellit është dezinfektuesi më i mirë”, deklaroi ajo.
Reagimi i Trump
Presidenti Trump, i cili përmendet në dosje, ka mohuar çdo lidhje të paligjshme me Epstein dhe tha për BBC se është “shfajësuar”.
“Nuk kam pasur asgjë të bëj me Jeffrey Epstein. Ata kërkuan prova dhe gjetën të kundërtën”, u shpreh ai nga bordi i Air Force One.
Shtëpia e Bardhë deklaroi se administrata ka bërë “më shumë për viktimat sesa demokratët ndonjëherë”, duke theksuar publikimin e mijëra faqeve dokumente dhe bashkëpunimin me Kongresin.
Jeffrey Epstein vdiq në një burg në New York më 10 gusht 2019, ndërsa priste gjyqin për akuza të trafikut seksual. Ai ishte dënuar më herët për shfrytëzim prostitucioni me të mitur.
As Hillary dhe as Bill Clinton nuk janë akuzuar për shkelje nga viktimat e Epstein dhe të dy kanë mohuar dijeni për aktivitetet e tij kriminale në kohën kur kishin kontakte me të. Po ashtu, Trump ka mohuar çdo keqbërje dhe nuk është akuzuar për krime nga viktimat e Epstein.
Debati mbi transparencën e plotë të dosjeve vazhdon në Kongres, me disa ligjvënës që kërkojnë publikimin e dokumenteve shtesë dhe memorandumeve të brendshme të Departamentit të Drejtësisë.
