Në prag të ndeshjes së Champions League ndaj Galatasarayt, trajneri i Juventusit, Luciano Spalletti, u përpoq të fokusohej te sfida në Stamboll, por u rikthye sërish te “Derby d’Italia” dhe polemikat e ndeshjes Inter–Juve. “Nuk dua të flas mbi fjalët e John Elkann dhe atyre në krye të klubit, por mund të them se Pierre (Kalulu) është një djalë shumë i mirë, njeri i rregullt. Që të quhet ‘budalla’ nga trajneri kundërshtar është diçka që s’e duroj dhe nuk e prisja… Kjo do të më jepte mundësinë të flisja edhe për lojtarët e Interit dhe nuk dua ta bëj,” tha ai.
Spalletti u ndal edhe te reagimi pas humbjes së së shtunës: “U thashë djemve me forcë se jam krenar për ta, nuk do t’i ndërroja me askënd në botë. Por tani duhet të pastrojmë mendjen dhe të jemi në lartësinë e një ndeshjeje të tillë, në një stadium ku drita të shpon edhe përmes maskës dhe të detyron të thuash të vërtetën…”.
Sa i përket kundërshtarit, Galatasaray e cilësoi si “pengesë të fortë, shumë të fortë”, ndërsa dyshja Osimhen–Icardi sipas tij është “si një enciklopedi e numrave 9”, për cilësitë që sjellin në fushë.
Në sulm, Spalletti konfirmon se mungon David dhe se Openda nuk do të jetë (“i ka pasur shanset, do t’i ketë përsëri…”). Zgjidhja e momentit është McKennie si “false nine”, sepse përveç lëvizjeve do t’i duhet edhe të mbajë topin që skuadra të ngjitet dhe të fitojë terren në “kazanın” e Stambollit. “Weston mund të luajë përpara: është teknik, i shpejtë, fizik… e ka treguar dhe mund ta tregojë edhe më mirë,” theksoi ai.
Megjithatë, vëmendja u kthye sërish te episodi në San Siro: Bastoni në tokë, arbitri La Penna dhe kartoni i dytë i verdhë që i mbylli ndeshjen Kalulut. I pyetur në mënyrë provokuese nëse do ta grumbullonte një lojtar të Interit në kombëtare, Spalletti u shpreh: “Mos i vendosni kufizime Rinos (Gattuso). Ai duhet të jetë i lirë të zgjedhë kë të dojë. Për më tepër, unë nuk jam më në krye të Italisë — një dhimbje që s’do të më ikë kurrë.” Dhe kështu, “Derbi i helmimeve” duket se nuk mbaron kurrë.
