José Mourinho, trajneri i Benficës, do të përballet sërish me Real Madridin në “playoff”-in e Champions League, pas ndeshjes së fundit mes tyre në fazën e grupeve, ku portieri Trubin u bë hero për lisboetasit.
Në konferencën për shtyp para sfidës së së martës në “Estádio da Luz”, Mourinho i bëri të qarta dëshirat e tij: të eliminojë Real Madridin nga Europa, por njëkohësisht të shohë Álvaro Arbeloa-n kampion në La Liga me “Los Blancos”. Portugezi theksoi se pret një ndeshje ndryshe taktikisht dhe se Benfica duhet të luajë sipas planit të saj, jo sipas ritmit që imponon Reali.
Mourinho pati edhe fjalë të mëdha për Arbeloa-n, duke e quajtur “trajner me aftësi të mëdha, me shpirt të fortë madrilen dhe personalitet për të drejtuar Realin”. I pyetur për një rikthim të mundshëm te Reali, ai e mohoi, duke kujtuar se ka kontratë edhe një vit me Benficën, ndërsa shtoi se dëshiron që Arbeloa të qëndrojë gjatë në krye të madrilenëve.
Ndërkohë, Real Madridi ka mbërritur në Lisbonë pa disa emra të rëndësishëm, përfshirë Bellingham, Rodrygo, Militão dhe Asensio, për ndeshjen e parë ndaj Benficës.
