Gjatë vizitës në Mynih, Ministrja për Europën dhe Punët e Jashtme, Elisa Spiropali, u takua me autoritetet akademike në katedrën e Albanologjisë në Universitetin Ludwig-Maximilian.
Spiropali u prit nga Zv. Presidentja për Humanitetet, Prof. dr. Carola Metzner-Nebelsick, dhe drejtuesja e katedrës, Prof. dr. Enkeleida Kapia, së bashku me profesorë, studentë dhe alumni.
Ajo theksoi rëndësinë historike dhe akademike të katedrës, krijuar rreth 60 vjet më parë nën drejtimin e Prof. Dr. Martin Camaj, me mbështetje të vazhdueshme nga shteti bavarez dhe Kryeministri shqiptar, Edi Rama.
Ministrja vuri në pah rolin e katedrës në lidhjet historike dhe kulturore mes Shqipërisë dhe Europës, duke e cilësuar atë si një urë për dijen, dialogun dhe bashkëpunimin kulturor.
Ajo theksoi gjithashtu kontributin e katedrës në zhvillimin e studimeve mbi gjuhën, historinë dhe identitetin shqiptar në kontekst europian.
Spiropali përfundoi duke theksuar se rrugëtimi europian i Shqipërisë mbështetet jo vetëm në politika, por edhe në themele identitare, akademike dhe kulturore, dhe se katedra e Albanologjisë dëshmon angazhimin e Shqipërisë për të forcuar lidhjet me Europën përmes dijes dhe kulturës.
